Heb 2 | ASO | STEP | Ido' mono' gamazi nogilune' nene angelo' ngivile' ogo dize minive O'moso'mi gipele'mo lo-limine' gamazi nenako nemu' nene a'mido' e'meto novube lo zovo' izo mala valonge. A'mine nogilune' gamazi lamine' mene lute gate molo gele lamine' o mino e'meto volone.

Hebrews 2

O'moso'mo Do Lu' Izaa' Neine' Nemu' Nene Inite' Naba Ve Lo Gele Mineloningumu' Lo-ngimine'

1 Ido' mono' gamazi nogilune' nene angelo' ngivile' ogo dize minive O'moso'mi gipele'mo lo-limine' gamazi nenako nemu' nene a'mido' e'meto novube lo zovo' izo mala valonge. A'mine nogilune' gamazi lamine' mene lute gate molo gele lamine' o mino e'meto volone. 2 O'moso'midati' gamazi ha angelolite lani' gamazi Mose' gizine' ne'mo nene amuzo'vesi miningumu' a'mine gamazi nene ma avuto' igi gili hulave engi' nene a'mine gamazi avuto' ani' votigilelo' nene di mili lihime ngimi mulumo inite' di-ngidaa' ani' ve. 3 Ido' a'mine amuzo've ngomosi minine' gamazi avuto' ave nene mulumo nite' ne'mine di-ngidaa' ani' nenako a'mine Mose' gizine' gamazi ivile' ogo dizo minine' inite' naba O'moso'mo lihimete hulo-ledo do lu' izeline' akate vele-lidine' ne'mi gamazi nene gilube gelamube ogo minelone' nene O'moso'mo lihime lemo mulumo nite' naba do-ledeleseive. Ido' a'mine mulumo nite' naba do-ledelinguti' nene mo ngelo olovo' amolosune. Ido' a'mine O'moso'mo lihimete hulo-ledo do lu' izeline' gamazi nene Guvelesi ve asi've ganatilise lo soto' ivo eze veleti' gilave nete lezela li hulani' ve. 4 Ido' lezela nili hulavo a'mine gamazi nene lamine' ve li ningilizave lo O'moso'mo ei' gala gilido' do molo ato' suno ogo amuzo malehe inite' ato atoli'mine do soto' ogo ido' a'mine gamazi li-limave nene Sikalahu'velati' amuzo ato ato' lehize-ngedo minine' ve. Ido' O'moso'mo ne'mine ine' nenako nemu' nene a'mine lihimete hulo-ledo do lu' izeline' gamazi nene lamineto' mo inite' naba goloso neive. Nemu' nene lute gate molo gele lamine' o mino e'meto volone.

Gomu' Molo Lemo Akate Velo Do Lu' Izaa' Ivete Aza A'mine Gono Dalido' Lisihe' Ogo Minelingumu' Ve Lo Aza Ei' Evenele Zuho Leli' Okode Ne'mine Do Otuho Mulumo Alumo Gelo Hiline' Ve Lo Lo-ngimine'

5 Ido' idise lo-lingimuvoni' nene monovo gosoho' soto' ilingu' vi hilalizani' alevemu' nene lo-lingimuvoni' ve. Ido' a'mine monovo gosoho' soto' ilingu' vi hilalizani' aleve nene angelo' engito' neve gelekele' i-ngidi minikevo gizebo i-ngidilizave lo O'moso'mo ma lo-ngedamive. 6 Ido' mono' godolou' gamazi ma ve mali'mo O'moso lo-imine' gamazi ma ti' lo gize neine' ma neive:

Laza evene' ngomo haza nite' none' lelikumu' nene
gaka gelo minelinido' minamane'za
aizo, lelikumu' nene gaka gelo minaa' nane.
Ido' evene' lemeni dameni nene lamine' amivo
gaza gizebo o-ledelinido' minamane'za
gaza nene ha gizebo o-ledaa' nane. Ido' ne'mine o-ledaa' naningumu' nene naza aizo lo gelekuve.
7 Evene' nene angelo' engitoti' gamene li'nibevo' lemeti' igi minilizave lo
gaza evene' nene angelototi' do leme-ngedo molo-ngede nane.
Gaza evene' nene do hozi lo-ngedo guve'inesi ve lolo' o-ngedane.
8 Ido' ne'mine o-ngedo evene' nete

inite' mata' mukito' gizebo igi minilizave lo
a'mine inite' mata' muki' nene eveneliti gize'ingu' do leme-ngedaa' nane.
Ee, O'moso'mo inite' muki' nene eveneliti gize'ninguko do leme-ngedo molave. Ne'mine ogavo inite' hamokisi evenelite gizebo amilizave lo molani' inite' nene ma nizamave. Ne neiha idise gameneuko ningaa' noune' nene inite' muki' nete evene' nene olihe gelekele' i-ngidi osu' lamavo ningaa' noune. 9 Ido' ningo gelaa' noune' nene O'moso aza angelototi' gamene li'nibevo' lemeti' ogo minelive lo angelototi' do lemeti' ogo hulo-dive Izesu'nimu' nene ningo gelaa' noune. Ee, O'moso'mo nasahili' o-ledo evene' mukikumu' helelive lo imiseline' ve. Ido' a'mine ve Izesu' nene mulumo gelo hilingumu' ve lo O'moso'mo do hozi lo-doo Guvelesi ve lolo' o-dine' nemu' nene mo ningo gelaa' noune.

10 Ido' O'moso'mo Izesu'ni imiselo mulumo alumo gelo helelive line' nene nanitekumu' ve. Izesu' nene do lu' izeline' gono dalido' olihe lisihe' gehepeve amo minine' nenako nemu' mulumo alumo gelo heleline' ne'mo a'mine leli' do lu' izeline' gono nene dalido' do lisihe' gehepeve o-delingumu' mulumo alumo gelo helelive lo O'moso'mo imiseline' ve. Ido' izipahala vai' lele'mize molo atoli'mine ogo do lamine' o-ledelesa gono do'mo vo mininguti' nene O'moso aza leli' gomu' molo lemo akate velo do lu' izelive Izesu' mulumo alumo gelo helelive lo imiseline' ne'mo nene monovo do lamine' goloso ine' ve. Ee, inite' mata' muki' ei' inite've eikumukovo' mini di dizilizave lo do soto' molave evene' naba O'moso aza Izesu'ni nene do lu' izelido' do lisihe' o-delesa mulumo alumo gelo helelive lo imiseline' ne'mo nene monovo do lamine' goloso ine' ve. 11 Ido' evene' lute noso izo gilito do lamine' o-ledo do O'moso'mi evenele lolo' o-ledaa' ivesi ido' lute do lamine' o-lidine' alevesi leli' meteho nene hamo' minine' aleve none. Nemu' aza lelikumu' nene neni' aku'ne alu'ne zuho nizave lolosa ovozo helesa'mive. 12 Ido' aku'ne alu'ne zuho ve line' nemu' mono' godolou' O'moso lo-imine' gamazi ma ti' li gizi nizani' ma neive:

Naza neni' aku'ne alu'ne zuho nene gei' guliveka nene lo soto' o ngemo
gei' guliveka do hozi lo leli' zuholiti muliseu' nene nama lolosuve.
13 Ido' leli' eveneliti lemeni damenisi minelingumu' line' gamazi gohi ma ti' li gizi nizani' ma neive:

Naza O'mosomu' gele ele'vole' o mino eito' lehete o minelove.
Ne'mine lo gohi ma ti' lo line' ma neive:

Ido' naza nene O'moso'mo neze izipaha'ne zuho nimine' mesi none' ningilo.
14 Ido' a'mine izipahala zuho laza nene hele vaa' okodesi none' nenako a'mine'mine ogo Izesu' aza heleline' ne'mo helaa' amuzo do minive Satani nene do goloso o-do ido' helakumu' ngehelele izaa' ne'mo gesi hizo hulo lulou' o-ngedavo ngehelele izaa' lulou' minave nesi nene aza helosa gesi kele hulo-ngedelesa hele vaa' okode ne'mine do otuho minine' ve. 16 Ido' ne'mine ine' nene angelo' aleve do ngu' izo ne'mine ine' nevoba mono' godolou' Abalahamu' a'vopilemo' zuho do ngu' izaa' neive li gizi nizado' e'meto ne'mine ine' ve. 17 Ido' nemu' nene eveneliti lihimete apase-ledelesa leli' hele vaa' okode ne'mine do otuho nakunolo alunolo zuho leli' gehepeve ne'mine lolo' iline' ogavo ido' eveneto' medeli mini O'moso inite' lehizi-daa' ave naba nete eveneliti lihime apasaakumu' gono daa' nanako ne'mine ve lolo' ogo evene' muhelete ningo O'moso'mi velelo' monovo lisihetoti' O'moso'mo lidokovo' gono dalosa eze akunolo alunolo zuho leli' gehepeve ne'mine lolo' iline' ogavo lolo' ine' nenako aza nene leli' gehepeve ne'mine lolo' amidiniko a'mine gono nene dalido' lisihe' mo amidine. Nemu' nene leli' gehepeve ne'mine lolo' iline' ogavo lolo' ine' ve. 18 Ee, ido' emengu' milangu' mulumo gelo minine' nemu' nene mo ningo gele neine' nenako ve ma ingine ngemengu' nimilavo minilizani' aleve nene hize ele' noo-ngedo alete molo-ngedelido' o neive.